PATUJOLO

Udut ni panghataion ni Ompu i Dr. I.L. Nommensen dohot Raja Pontas Lumbantobing, didok ibana, anggo sangkap hamajuon na binoanna tu tano Batak na paduahon i ma: Hahipason. Ala sadalan do “hahipason’ dohot “haiason”, gabe pinadomu ma na dua pandohan i. Asa panghobasion tu taon 2018 na ro on, i ma: Sangkap Panghobasion HKBP Taon 2018: Hahipason dohot Haiason  di Ngolu Humaliang.

Marpardomuan do na dua pandohan i, hahipason dohot haiason, di panghataion ni Ingwer Ludwig Nommensen dohot Raja Pontas Lumbantobing. Didok Ompu i Nommensen ma uju i: sangkap harorona tu tano Batak i ma laho mamboan “hamajuon”. Lapatanna asa gabe bangso na maju bangso Batak. “Hamajuon” i jumpang marhite opat (4) ulaon panghobasian, i ma:

  1. Gabe bangso na bisuk, na pistar jala na malo.
  2. Gabe bangso na hipas, di pardagingon dohot partondion.
  3. Gabe bangso parasiniroha, na marpanarihon tu donganna jolma, tontu lumobi tu angka na tinandana, alealena, sisolhotna, donganna, ripena, ianakhonna, nang tu dirina sandiri.
  4. Gabe bangso parbarita na uli, taringot tu haluaon na binoan ni Tuhan Jesus Kristus.

Autsura didok Nommensen uju i, ia sangkap harorona, isarana, i ma laho mamboan ugamo, manang haporseaon taringot tu Tuhan Jesus Kristus, disura roha, tulahon ni Raja Pontas do harorona i. Ai nunga adong ugamo Batak, i ma haporseaon na pineopna. Jala sude panggulmiton dohot ngolu ni halak Batak, na diula do i hombar tu ruhutruhut parugamaon na hinaporseaan ni halak Batak. Ai manang aha pe diula halak Batak, di jabu nang di balian, marojahan do i tu panghaposionna tu Debata na hinaporseaanna. Alai parpudi do didok na naeng mamboan hakristenon tu bangso Batak.  I pe Barita Na Uli do didok, i ma na sian Jesus Kristus, na naeng boanonna. I do umbahen na ungkap rohana manjangkon Nommensen.

Saut do dipatulus Ompu i Nommensen ulaon panghobasion songon na hinatahonna tu Raja Pontas Lumbantobing, marhite na mangarangrang ulaon panghobasion: mangeahi habisuhon dohot hahipason, parasinirohaon dohot marbarita na uli.  Sahat tu taon 1960-an, denggan do mardalan songon na hinatahon ni Ompu i Nommensen. Dung pe i, ngernger alai lam nalnal tarida, na lam sumurut parsitutuon ni huria tu ulaon panghobasion na opat i: mangeahi habisuhon, hahipason, ulaon parasi ni rohaon dohot tu ulaon zending, manang marbarita na uli.

Diula Ompu i Nommensen do na nidokna i saleleng mangula ibana songon missionar di tano Batak. Marhite panghobasionna, rap dohot angka donganna missionar naung adong di tano Batak dohot na ro muse sian pudina, diajari do halak Batak di ragam ni parbinotoan, di pangantusion taringot  tu hahipason, ulaon parasinirohaon dohot di haporseaon tu Tuhan Jesus Kristus. Dapot hita do pangantusion i sian panindangion ni Pdt. Lamsana Lumbantobing, Pandita Batak na hea mangula di HKBP Peanajagar, 1903, tingki ni Ompu Ephorus I.L. Nommensen gabe Ephorus HKBP, di na nidokna songon on:

“Asa on ma Tuannami, Tuan Ephorus: Tangkas do huhilala anggo holong ni roham di ahu dohot di sude pangula di harajaon ni Debata di tano Batak on. Didjarumi  ho do angka na bikbik i,  diubati ho do Tuannami na marbosar i. Huhilala do pandjarummu dohot pangubatim na sai laon, djala malum do huhilala. Ai malo do Tuan i tumanda ubat ni angka na hansit. Ai Doktor do Tuan i.”[1]

Ala ni i do umbahen na tubu sangkap  mangarangrang panghobasian ni hurianta di periode on (2016 – 2020). Dung niida na lam sumurut  tondi parsitutuon mangula ulaon panghobasion i, ni totophon ma patupa sangkap revitalisasi – dalan pahehehon, pahinsathon dohot pangoluhon angka ulaon panghobasion di huria songon na ginoaran ondeng. Sangkap disi, asa sumuang nian jala lam mangolu, lam tubu, jala lam marherbang angka ulaon panghobasion pahinsathon parbinotoan, mangeahi hahipason, parsidohot mangula di ulaon parasinirohaon dohot di ulaon zending – ulaon marbarita na uli.

Di ujung ni taon 2017 on, di na pinasahat sangkap taringot tu ulaon on tu Rapot MPS HKBP, 31 Oktober – 2 Nopember 2017, tongon mardalan dope “Orentasi Pendidikan dan Pemberdayaan,” jala marujung ne ma i di bulan Desember 2017 na ro on. Alai di bona ni taon 2018 na ro on, di na tongon patupahon “Partangiangan Hamauliateon Hatopan Bona Taon 2018” na tasangkapi patupaon di ari Jumat, 5 Januari 2018, di Pearaja Tarutung, patupaon ma disi “Launching” – pabotohon sangkap: “Manatap Panghobasion Taon 2018 – Hahipason dohot Haiason di Ngolu Humaliang.” Di bagasan partangiangan hamauliateon i, patolhason ma sangkap angka na naeng sihobasan ni huria di ganup  tirket: di hatopan, Distrik, Ressort dohot di huria marsadasada di taon 2018.

Asa umbahen na pinaandar pe sangkap on di tonga ni Rapot MPS, 31 Oktober – 2 Nopember 2017, asa lam tu dasipna do panghobasionta tu taon 2018 na ro. Ala ni sieahanta do pangaradeon na  lam dumenggan ganup taon. Asa unang adong huria mangula sihobasanna marhite na “marnida di lapik”. Nunga tingkina eahanta angka sihobasan di huria i marhite sangkap pangaradeion na lam dumenggan, lam dumasip jala lam ummampit. Holan marhite pangaradeion sisongon i do boi hurianta paradehon dirina mangadopi ragam ni angka na masa. Molo dung songon i, boi ma jumpang ojahan na sintong huria songon pamatang ni Kristus, na mian jala mangolu di bagasan Kristus, na marhaporseaon, marpanindangion jala marpanghirimon tu Tuhan Jesus Kristus saleleng mangolu di hasiangan on.

 

RAKSA NI HAHIPASON

Marpardomuan do hahipason dohot haiason. Somalna, halak na hipas, ias do pamatangna, ias bagasna, jala ias inganan na humaliang ibana. Jala halak na ias pasti hipas do parngoluonna. Asa saurdot jala sarombang do pangalaho hasomalan hahipason dohot haiason. Halak na ias do na hipas, jala halak na hipas do na ias. I do pangalaho di parngoluan na sasintongna.

Sian hatorangan panghataion ni I.L. Nommensen dohot Raja Pontas Lumbantobing, sintuhu haroro ni Nommensen manopot bangso Batak i ma laho mamboan hahipason. Sadalan jala saurdot do hahipason dohot haporseaon. Atik pe sipata sai adong, isarana, hipas ngolu ni haporseaonna tu Tuhan i atik pe marsahit do nian pamatangna. Lapatanna, tongtong do marsihohot ibana marhaporseaon tu Debata saleleng ngoluna, atik pe sasintongna adong do sahit ni pamatangna. Asa ndang targanggu haporseaonna tu Debata atik pe marsahit pamatangna. Tutu sai adong sipata panghorhon ni hahipason tu panghaporseaon. Adong do halak na mandele, gabe ganggu haporseaonna tu Debata ala ni sahit pardagingon na ni aena. Ai ndang tarsirang, sipata, ngolu pardagingon tu ngolu partondion. I do umbahen na di angka tingki na parpudi on ndang be sai dibolat manang dipapulik mangeahi hahipason ni partondion dohot hahipason ni pardagingon. Ala rap ringkot do duansa, jala duansa, hahipason pardagingon dohot partondion rap marpanghorhon do tu ngolu ni hita hajolmaon.

Di buku Bibel na badia i pe, ditaringoti do taringot tu hahipason. Paboa na adong do hadomuan ni haporseaon tu Tuhan Jesus Kristus tu hahipason ni pamatang marhite hamamalum ni sahit. Manang na piga hali didok Jesus do tu angka na manghaporseai Ibana, na malum do sahit ni pamatang hinorhon ni haporseaon tu Tuhan Jesus. Tu sada ina naung 12 taon marsahit bulanon, didok Jesus: “Haporseaonmi do na pamalumhon ho, mardame ma ho muli!” (Luk 8:48). Tu si Jairus na mangido hamalumon ni sahit ni boruna, didok Tuhan Jesus:  “Unang ho mabiar, asal porsea ho sai mangolu do ibana” (Luk 8:50).  Tu sahalak induk ni soldadu mangido hamamalum ni sahit ni naposona, didok induk ni soldadu i ma tu Jesus, holan hata sisandok pe hatahon, sai na malum do ibana.  Gabe didok Jesus ma tu siseanNa i: “Gari di bangso Israel ndang jumpang Ahu haporseaon sisongon i” (Mat 8: 10).

Tu boru Kanaan i, na mangido hahipason ni boruna, ala ni haporseaonna tu Jesus, didok Jesus ma tu ibana: “Balga do haporseaonmi inang. Saut ma na pinangidomi” (Mat 15:28). Tu sahalak na huliton, na mulak mandok mauliate, didok Jesus ma tu ibana: “Hehe ma ho, laho ma! Haporseaonmi do paluahon ho” (Luk 17: 19). Di tingki dipamalum Jesus sahalak dakdanak na solpoton, didok Jesus ma tu angka siseanNa: “boasa so tarpatupa hamu mangulahon na songon i? Dialusi Jesus ma nasida: “Na marhagogoon do na porsea i patupahon saluhutna” (Mark 9:23).

Asa sadalan do ulaon marbarita na uli, na pararathon Harajaon ni Debata, marhite na patubegehon hataNa, rap dohot na pamalumhon ragam ni sahit. Tu ulaon sisongon i do dipaborhat Tuhan Jesus angka siseanNa, asa taruli angka na torop di hahipason ni pamatang nang di partondionna, songon na nidok ni na tarsurat i: “Dung i dipapungu ma na sampuludua i, dilehon ma gogo tu nasida dohot huaso, mangalo nasa tondi na hodar nang pamalum angka sahit. Disuru ma nasida mamaritahon harajaon ni Debata jala pahisarhon halak.” (Luk 9:1-2).

Tutu sai na rumingkot do hahipason ni partondion sian pardagingonta. Molo hipas partondionta, atik pe di bagasan sahit pardagingonta, na boi manahan do hita disi di bagasan habengeton, ala parbue ni haporseaon do habengeton. I do umbahen na didok apostel Paulus: “Itahalashon do angka haporsuhon, ala taboto dihorhon haporsuhon do habengeton ni roha. Jala dihorhon habengeton ni roha i do hatauon, jala hatauon i do manghorhon panghirimon. Alai ndang na murak hita bahenon ni panghirimon, ala nunga diusehon di bagasan rohanta holong ni roha ni Debata marhitehite Tondi Porbadia, naung ni lehonNa i tu hita.” (Rom 5: 3-5).

Asa adong dope ngolu sihirimon molo hipas ngolu partondionta, ai disi mangolu haporseaon tu Tuhan Jesus Kristus. Ai ia disi adong haporseaon, disi do adong holong ni roha dohot panghirimon (1 Kor 13:13).  Alai aut sugari ndang adong be haporseaonta, nang pe hipas pardagingonta, tung so marlapatan be ngolu on. Alai molo marhaporseaon hita, tung pe adong parsahiton di pamatangta on, na tongtong do hita boi manahan hinorhon ni panghirimon i. Asa songon panindangion ni apostel Paulus i do, di na nidokna:

“Hona basirbasir do ahu di sibukhu, i ma suruan ni sibolis na mamukpuhi ahu, asa unang hupatimbo diringku. Tolu hali do hupangido sian Tuhan i, asa sumurut i sian ahu. Gabe didok Ibana ma tu ahu: ‘Tuk ma asi ni rohangku di ho; ai di hagaleon do sun timbul hagogoon’. Asa tagonan ma hupapujipuji diringku di bagasan angka hagaleonhu, asa songgop tu ahu hagogoon ni Kristus” (2 Kor 12: 7-8).

Asa ndang sai sude pangidoan hamamalum ni sahit dioloi Tuhan i. Apostel Paulus pe dipangido hamamalum ni sahitna, alai ndang dilehon Tuhan i tu ibana. Alai nang pe so dioloi Tuhan i pangidoan ni apostel Paulus, dihabengethon do saluhut na tinaonna i di ngoluna. Gariada lam pos situtu rohana manghatindanghon: “Saluhutna do tarpatupa ahu marhitehite Ibana na margogoihon ahu” (Pil 4:13). Asa tutu do ringkot hahipason ni daging on, alai dao rumingkot jala dumenggan do molo jumpang hita hahipason ni ngolu partondion, i ma haporseaon na togu. Alai nang pe songon i, adong do panghorhon ni sahit tu haporseaon. Ala ni, torop do halak mangubati sahitna marhite haporseaon, ugamo dohot partondion, didok ma i: faith healing, spiritual healing and/or religious healing. I do umbahen na didok: “medical treatment of illness includes concern with the spiritual condition of the patient” – (“sangkap pangubation ni sahit marhadomuan do tu pangantusion taringot tu ngolu partondion ni na marsahit. Asa didok do muse: “It is evident that spiritual influences are underliving the therapeutic methods recognized by scientific medicine”. – “Asa panghorhon ni ngolu partondion do na gabe ojahan ni sude dalan laho mangalului hamamalum ni sahit, na tinolopan ni angka dokter”.[2]

Marhadomuan do hahipason ni daging tu panghaporseaon tu Tuhan Jesus. Ala ni i do lam tu toropna do nuaeng on na mangaradoti hahipason ni dagingna rap dohot hahipason ni tondina. Digoari ma pangaradotion sisongon i na holistic – menyeluruh, na singkop, na so pola marimbar panarihonon di hahipason pardagingon dohot hahipason partondionna, ala rap ringkot do duansa jala adong do hadomuanna. Lapatanna, marpanghorhon do hahipason ni pamatang tu haporseaon, suang songon i do haporseaon tu hahipason ni pamatang.  I do umbahen na didok angka na pistar ni halak Gorik na jolo: “mensana in corpore sana” – dalam tubuh yang sehat terdapat jiwa yang sehat.  Asa duansa do ingkon siradotan, so pola mardiaimbar.

Debata do haroroan ni tua dohot pasupasu na ringkot di ngolu on. Sian Ibana do tajalo hahipason dohot gogo na mardapotdapot.  Asa manang ise na mian jala jonok tu Debata, sai na dapotan tua do ibana, sai na mangolu di bagasan hahipason do ibana. Manang ise na marlinggom, na marpangunsandean tu Debata, sai na dapotan pangondian do ibana sian Debata. “Sai jagaon ni Jahowa do ho sian nasa parmaraan, sai jagaonNa do tondim” (Psalm 121:7). Dung i muse, las do roha ni Debata mida jolma na ro  tu Ibana, na solhot  tu lambungna, na olo marlinggom, mangido pangondian, mangido pangurupion, jala na sai mangunsande tu Debata saleleng ngoluna di hasiangan on. Angka jolma sisongon i ma na olo pasahathon dirina tu Debata, ala dirajumi sian Debata do saluhutna dijalo nasa na adong di ibana, gabe dipasahat ma muse mulak tu Debata bahen pelean parsombaon tu Ibana. Asa angka na porsea, na di bagasan hahipason, hipas do pamatangna, hipas do nang tondina, nasida do na ungkap mangendehon ende on bahen pujipujian tu Debata:

BE 470: 1-3: Jesus Ho Nampuna Au

Jesus Ho nampuna au dohot na adong di au

Gogo dohot hosangki sahat ma tu tanganMi

Sai rajai ma matangki manangkasi dalanMi

Sai patinggil pinggolhi tumangihon hataMi

Dohot tanganhi tahe naeng manjama na ture

Dohot pat sai naeng tongtong mandalani dalanMon

 

BE 6:3, Puji Jahowa Na Sangap

 Puji Jahowa naung tipak manompa dagingmu

                                Jala na tongtong manumpak hisar pamatangmu

Jotjot do ro pangurupiNa tu ho uju na ro hagogotan

 

BE 452:1, Na Ro Pandaoni Bolon i

Na ro Pandaoni Bolon i, i ma Tuhanta Jesus

Di daoni na marsahit i, hisar dibahen Jesus

Uli ni barita i, las ni roha bolon i

Sai dipuji rohangki Jesus, Jesus

Angka na mian di bagasan asi ni roha ni Debata, na tongtong marhaporseaon tu Ibana, diparhatopot do na Debata do na mangalehon hahipason, jala haroroan ni hahisaron, huhut na parmudumudu ngoluna. I do umbahen na dihatindanghon raja David di ngoluna: “Puji ma Jahowa ale tondingku, jala unang tung halupahon denggan basaNa sudena. Ibana do manesa dosam sudena, Ibana pamalum angka sahitmu sudena.” (Psalm 103: 2-3). Panurirang Jesaya pe tong do manghatindanghon na sian Jahowa do haroroan ni gogo dohot hahipason: “Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojong nasida ndang olo loja, mardalani nasida ndang olo mandate. ” (Jes 40:31).

 

HAHIPASON DI PANGANTUSION BATAK

Ndang apala dao imbar ni lapatan ni hahipason di bangso na asing tu pangantusion ni halak Batak. Hira sarupa do lapatanna, gariada umbagas do lapatan di pangantusion ni halak Batak idaon. Mangihuthon habatakon, ndang sirang hahipason ni ngolu pardagingon sian ngolu partondion. Hombar do i tu pangantusion taringot tu hajolmaon di halak Batak.

Ndang apala siparsoalhonon be nuaeng pangantusion taringot tu hajolmaon na marharoroan sian dua hadirion, digoari ma i: dichotomy – daging dohot tondi. Nuaeng on nunga tumorop angka na pistar manjalo pangantusion taringot tu hajolmaon mangihuthon pangantusion trichotomi – daging, roha dohot tondi (tubuh, jiwa dan roh).[3]

Nian ianggo pangantusion ni halak Batak taringot tu ngolu ni jolma on, songon na nidok ni Harry Parkin, na marojahan tu pangantusion totalitarisme.[4] Lapatanna, sisada hasadaon do ngolu pardagingon dohot ngolu partondion. Hibul do ngolu on. Ndang sirang ngolu pardagingon sian ngolu partondion. Ai jolma na mangolu, i ma jolma na mardaging dohot na martondi.  Asa ndang tarsirang pardagingon sian partondion. Molo sirang daging sian tondi, digoari ma i jolma na so martondi. Molo tung pe mangolu alai ndang disi be ianggo tondina. Mangihuthon habatakon, molo masa na songon i, sijouon do tondi asa mulak tu badan. I do umbahen na adong ulaon adat di habatakon  na jolo: manghirap tondi, manang mangalap tondi. Sian pangalaho na masa i ma tubu pandohan: nunga mulak tondi tu ruma. Lapatanna, nunga sumuang be hajolmaonna, ala naung mulak tondi tu badan. Dung i diupa ma ibana: Pir ma tondim! – lapatanna, unang be daoldaol, unang  be morotorot, unang laolao tondi sian badan.

Mangolu dope pangantusion totalitarianisme di tongatonga ni halak Batak sahat tu tingki nuaeng on. Alana ndang sala pangantusion ni Batak i tu pangantusion di hakristenon. Sian pangantusion sisongon i do haroroan ni umpama on:

Pir ma pongki, bahulbahul ma pansalongan

Pir ma tondi, lujuluju ma pangomoan.

Martantan ma baringin

Marurat ma jabijabi

Horas ma tondi madingin,

Pir ma tondi ma togu

Tumpahon ni Ompunta Mulajadi

 

Lapatanna, parngoluon na sigkop i ma molo dung rade manang dapot angka na ringkot di ngolu pardagingon on, songon na tarida sian “pongki na pir”, inganan ni eme naung gok jala suksuk. Dung i bahulbahul na boi pangkeon gabe pancalongan, mangalului ngolungolu siganup ari. Suang songon i ma nian tondi i, ndang muramura munsat, morot, alai hot jala togu ma maringanan di rumana, i ma di badan. Alai ndada holan i, nang angka na ringkot i pe tipak ma jala rade. Asa ndada holan horas ngolu partondion, alai ingkon hot jala togu marhaporseaon tu Debata, ditumpahi jala dipasupasu na jumadihon hita.

 

MANGEAHI HAHIPASON

Di partingkian ni Ompu i Nommensen, ragam do sahit na songgop, na bali mangararati, epidemy, di sandok Tano Batak nang di rura Silindung. Masa do sahit rojan – rojanon. Hatiha i, olo do tompu sasahalak morus, hassar huhut mutauta. Ndang sadia leleng nunga manigor marujung ngolu. Godang do na so umboto aha do sahit i jala aha sialana. Gabe didok halak Batak ma uju i na binahen ni begu antuk do i ala hatophatop marsahit, jala songon na diantuk partompuna, dung i manigor mate, gabe didok ma na begu antuk do na mambahen sahit i.

Molo masa sahit sisongon i, manang molo habotoan adong halak na morus, hassar jala mutauta pangisi ni sada huta, manigor di tangkup do i jala ditaruhon tu hauma, dung i dibahen ma sopona, marrumang rumaruma na metmet, dung i dibeanghon ma ibana di bagasan sopo i. Dibahen ma pintu pandiloan, dalan manurdukhon sipanganon. Sangkapna disi asa unang mangararati do sahit tu sude pangisi ni huta i. Molo dung dibeanghon, dipasombu ma, holan didulo do sian na dao, atik tung mangolu dope ibana. Molo mangolu dope disurdukhon ma muse sipanganonna. Saleleng di pangan sipanganon na sinurdukhon i, i ma paboa na mangolu dope ibana. Molo ndang dipangan be, i ma paboa naung mate ibana. Dung i dibuat ma bangkena sian bagasan sopo i laho mananomsa.

Asa dung pe ro Ompu i Nommensen, dipabotohon ma tu na torop, ia sahit i ndada ala ni begu antuk, jala ndang adong sasintongna begu antuk. Ia goarni sahit i, i ma disentry, hata nuaeng didok ‘munmen’ – muntah menceret. Asa sasintongna, mura do ubatan sahit i, holan oralit do ubatna, molo ndang adong oralit boi do pangkeon sira – garam dapur – na dibahen saotik tu aek siinumon na mohop. Alani i do umbahen na tarbarita sira gabe ubat manang pandaoni ni sahit, manang sahit aha pe i. I do umbahen natorop na jolo parjajo, partigatiga sira, sian Sumatera Timur tu Tapanuli ala hinorhon ni i, lumobi dung dibuka dalan balobung sian Balige tu Pematangsiantar, Simalungun, bona ni taon 1900-an.

Asa nunga ditatap Ompu i Nommensen hian na ringkot do  hahipason di tongatonga ni bangso Batak, jala ala ni i do umbahen na dibahen haiason i bagian sian ulaon na pararat Barita Na Uli tu bangso Batak. Asa sian i tangkas ma taboto na adong do hadomuan ni habisuhon, parbinotoan, manang hapistaran (Program Pelayanan 2017) dohot panghobasion tu hahipason dohot haiason. Ai angka na bisuk do na umboto hinaarga ni hahipason, gabe olo ma ibana mangaradoti huhut manjamothon hahipasonna. Alai ianggo halak na oto, ndang diboto i manjamothon hahipasonna. Ala ndang diantusi halak na oto hinaarga ni hahipason. Asa alani i, ingkon siradotan jala siurupan ni huria do ruasna mangantusi jala mangargahon hahipason. Dung i sisosoan ma nasida muse asa radot, hobas jala hibas mangaramoti, mangaradoti, manjamothon huhut mangeahi hahipason. Dalan asa jumpang hahipason i, ingkon mian jala mangolu di bagasan haiason. Haiason ni pamatangna sandiri, bagasna, hutana nang luat na humaliangsa.

Hombar tu sangkap patupa panghobasion hahipason di bangso Batak, sopot di bona ni panghobasion ni angka missionar manigor dipajongjong do Rumah Sakit di Tarutung taon 1900, na maringanan di Pearaja, apala di jolo ni gareja HKBP Pearaja sinuaeng. Digoari ma i Rumah Sakit Induk. Mangihut tusi, dipajongjong ma 14 Rumasakit dohot 12 Balai Pengobatan – manang poliklinik – di sandok na hinobasan ni Zending Rheinische Mission-Gesselschaft – (RMG) di hatiha i.[5]

Alai ndang adong dope nanggo 10 taon jongjong Rumah Sakit Induk na di Tarutung, nunga masa mara bolon di tano Batak. Di taon 1909, masa do sahit epidemic na ginoaran ni halak Batak sahit rojan, songon naung pinatorang nangkin, manang di hata nuaeng didok disentri. Di sandok luat na hinobasan ni sending do hararat ni sahit i, lumobi di Tarutung, Balige, Doloksanggul, Butar dohot di Pangaribuan. Jala di tingki i nunga lam mangareak sahat tu Habinsaran. Marhite panghobasion ni Rumah Sakit Induk na di Tarutung, ari 3 Juli 1916, manjalo pangurupion ma RS Induk Tarutung sian pamarenta Bolanda  marhite na dipajongjong inganan parmianan ni angka na hona sahit i, na ginoaran “Isolir Barake” – songon “barak” manang “bangsal.” I ma dipangke gabe inganan pasodinghon angka na marsahit i asa pulik inganan parmiananna sian angka na torop na hipas. Ndang sadia leleng, dung lam godang na malum, dipasada ma “Isolir Barake” i jala dipajongjong ma gabe sada Rumah Sakit Pembantu di Balige. Dipungka ma ulaonna i di ari 1 Agustus 1918, na niuluhon ni Missionar K.H. Weissenbruch.[6] Ari on ma rajuman ari hatutubu ni Rumah Sakit HKBP Balige.

Dung olat ni i lam tarbarita ma Rumah Sakit Pembantu na di Balige, jala lam dipabalga ma nang angka inganan ni angka na marsahit marhite na manambai kamar dohot podomanna. Asa di taon 1928 ma Rumah Sakit Pembantu na di Balige gabe Rumah Sakit na gok. Nuaeng on margoar: Rumah Sakit HKBP Balige.

 

HAHIPASON DOHOT HAIASON DI NGOLU HUMALIANG

Marpardomuan do hahipason dohot haiason di ngolu on. Somalna, molo ias pamatang, na ias do na pinangan dohot inganan di dia hita mian jala maringan. Asa sai dao do sahit sian angka na ias. Ai subang ni sahit do na ias. Asa ndang siinganan ni sahit angka na ias. Asa halak na hipas i ma halak na mian di bagasan haiason. Suang songon i do sabalikna, halak na mian di bagasan haiason i do halak na hipas. Alai anggo na rotak, na dorsun dohot na kotor disi do mian gulomitgulomit ni sahit, jala simbur mangararati tu inganan na asing. Asa hahipason na jumpang di ngolu on na ro do i sian haiason ni dirinta nang sian inganan na humaliang hita. Alani ringkot do hita mangeahi, patulushon, patupahon huhut patomutomu ulaon haiason asa jumpang hahipason di ngolunta on, di pamatang, di bagasta be, di huta, di na humaliang hita, nang di tongatonga ni angka na torop.

Asa molo hipas pamatangta, ias ma nang rohanta, marolopolop ma nang tondinta. Ria jala lam tu ringgas na ma hita mamuji Debata. Pangkeonta ma ruas ni pamatangta laho mamuji huhut pasangap goar ni Debata. Ala na adong do di hita hahipason umbahen na las rohanta mamuji Debata marhite sude ruas ni pamatangta dohot nasa na adong di hita. Alai umbahen na jumpang pe hahipason, ala na mian do huta di bagasan haison. Asa mampanghorhon situtu do haiason patubu hahipason.

Di pangantusion ni halak Batak, mansai tangkas do adong hadomuan ni haiason tu hahipason. Jala hahipason i pe marpardomuan do tu ngolu na humaliang, isarana, hinadenggan ni angka suansunan, sopar ni angka dorbia dohot nasa na manggulmit, hinauli ni tombak, dolok, sunge dohot angka na tinompa na asing. Saluhutna i mampanghorhon na denggan do tu ngolu pardagingon ni jolma, nang tu ngolu partondion dohot tu ngolu na humaliang. Na rap marsiraingraingan do panghorhonna dohot panumpakna tu sude nasa na tinompa. Sarupa do i tu na niula  ni Debata songon Sitompa nasa na adong nang tu ngolu ni jolma na tinompaNa. Asa ndang boi sirang angka na tinompa ni Debata sian Debata sandiri, Sitompa ibana. Ndang pulikpulik na tinompa na sada sian na sada nari. Ala Debata do na manompa jolma i, laos Ibana do na sumarihon nasa na ringkot di ngolu pardagingon nang di ngolu partondion ni jolma i. Laos Debata sandiri do manarihon ngolu ni angka na tinompa na asing. Tarida do pangantusion i sian umpama on:

Eme sitambatua

Parlinggoman ni siborok

Debata do silehon tua

Saluhutna ma hita diparorot

 

Hadomuan ni eme na tubu di hauma dohot siborok na marlinggom di bonana manggombarhon ngolu na masitumpahan.  Rap masitumpahan do partubu ni eme dohot partubu ni siborok i. Tamba do lomak ni eme binahen ni parasaran ni siborok i, jala tamba denggan do ngolu ni siborok i, ala boi marlinggom di bona ni eme i. Laos songon i do gombaran ni ngolunta di adopan ni Debata. Sai na dapotan pasupasu do ngolu ni sahalak na mian jala maringanan, manang marlinggom, di lambung ni Debata. Asa molo mian jala mangolu hita di bagasan lomo ni roha ni Debata, tagamonta ma hahipason ni pamatangta, nang hahipason ni tondinta.

Laos songon i do hadomuan ni ngolu pardagingon tu partondion. Na masitumpahan do ngolu partondion dohot ngolu pardagingon. Molo denggan ngolu partondionna laos denggan do ngolu ni pardagingonna. Tontu hinadenggan ni ngolu pardagingon ndang disuhat sian sidabudabuon, sinadongan, arta manang hamoraon. Alai sian panandaion diri do dipangurupion na jinalona sian Debata, sian donganna jolma dohot sian angka na humaliangna ibana, marhite sian angka  na tinompa ni Debata.

Asa lam tu ulina jala singkop do ngolu pardagingon on ala ditumpaki, dipasingkop, diurupi jala dipargogoi ngolu partondion. Suang songon i do nang sabalikna. Lam tamba do pos ni roha dohot haporseaon tu Debata molo boi ni antusan, ni panghilalahon jala ni hamauliatehon angka basabasa na ni jalo sian Debata di hangoluan on.  Tamba do pos ni roha dohot hatotogu ni haporseaon tu Tuhan i molo ni antusan angka na masa di ngolu pardagingon on. Ai sian ngolu pardagingon do boi nalnal idaonta pambahenan ni Debata, pangurupionNa dohot holong ni rohaNa tu hita jolma. Sian pangantusion na songon i do patubuhon roha na ungkap mamuji dohot pasangaphon Debata huhut manghamauliatehon saluhut na masa  di parngoluonta songon jolma na mangolu di hasiangan on.

Asa roha na manghamauliatehon ndada tubu i sian godang ni na jinalo, alai ala ni panghorhonna na denggan sian na jinalona i do tu parngoluon on. Asa na masilehonan jala masitumpahan do ngolu pardagingon dohot ngolu partondion. I do alana di pangantusion ni halak Batak, adong do hadomuan ni ngolu pardagingon tu ngolu partondion, marhite na masitumpahan, marsiantusan jala gabe marsiurupan. Asa  adong umpama ni halak Batak na mandok:

Bagot na marhalto ma na niagatan di robean

Horas ma hami na manganton,

sai tu tambana ma di hamu na mangalean.

 

Mansai denggan do bagot na tubu di robean. Nang pe tubu di atas tano na rahis, alai dao dumenggan do bagot na tubu di tano rahis sian na tubu di atas tano na hornop. Ala partubu ni bagot i sandiri nunga manumpahi tu tano i, mambahen ndang lunsur, ndang matorban. Nang pe rahis tano i, alai hot do partubu ni bagot i diihoti uratna. Angkup ni muse, partubu ni bagot na di robean i nunga maniopi angka tangkuju na naeng lunsur tu tano na hornop. Gabe martumpu ma tangkuju di bona ni bagot i. Panghorhonna, lam napu ma tano hatubuan ni bagot na di robean i. Mampanghorhon do angka tangkuju i  tu bona ni bagot i mambahen napu, gabe simbur ma partubu ni bagot i ala tubu di tano na napu. Rugun ma bulungna, ramos ma arirangna, godang ma nang parbuena. Asa partubu ni bagot di tano na di robean i pe nunga patuduhon ngolu na masitumpahan. Gabe denggan jala napu ma tano i. Dung i muse, ndang olo be lunsur manang matorban. Ala di tano na rahis do tubu bagot i, ditiopi bona ni bagot i ma angka tangkuju i. I ma na mambahen lam napu tano i, jala togu ma bona ni bagot i ditiopi tano na rahis i. Marparbue na godang ma bagot i. Asa digombarhon bagot na tubu di robean i do ngolu na ma situmpahan. Tano i manumpahi bona bagot na tubu i, jala urat ni bagot i pe maniopi tano na rahis i asa unang runsur manang asa unang martorban tano i.

Di na laho manimpuli panghataion, manang di na laho marsirang, manang di na mangujungi ulaon sai dipasahat do pintapinta dohot pangidoan marhite hata ni umpama on:

Napuran tanotano,

rangging masiranggongan

badanta pe padaodao

alai tondinta i ma  masigomgoman

 

Badanta pe padaodao alai tondita i ma masingomgoman – on ma unok ni pangantusion ni halak Batak taringot tu hasadaon dohot hadomuan ni ngolu pardagingon dohot ngolu partondion. Bulung ni napuran somal do sai mangerbang jala padaodao, alai anggo uratna di toru, di bonana di tano haroroan manang hatubuan ni napuran i, masirangging masiranggongan do, jala rundut masiraingraingan, alai laos disi do parsihohot ni partubuna, jala ala ni na masitomuan i do mambahen lam togu bonana jala lam rugun bulungna. Hira songon i ma pangantusion ni halak Batak taringot tu tondi dohot badan. Boi do badan ni jolma padaodao, alai tondina tongtong do jonok masigomgoman. Boi do hita jolma marsirang padaodao, alai ianggo halak na masihaholongan, tondina tongtong masigomgoman.

Marhite angka umpama ondeng nunga lam tangkas taida na so tarsirang ngolu pardagingon sian ngolu partondion. Jala na so sirang  ngolu pardagingon sian partondion di parngoluon ni jolma. Tarida do i sian ngolu na ginombarhon ni jolma dohot hadomuanna tu ngolu ni angka na mangolu ni di tano on. Asa ngolu pardagingon dohot ngolu partondion sisada hasadaon do i, jala ndang tarsirang i sian hangoluon on.

Tutu nuaeng on, manang di tingki na parpudi on, nunga lam sega parsaoran manang hadomuan ni ngolu ni hajolmaon sian ngolu ni partondionna. Rupani, hira holan ngolu pardagingon nama dieahi jolma, alai ngolu partondionna nunga hurang  dianturehon. Suang songon i  do panarihnonon di ngolu ni angka suansuanan, dorbia dohot angka na tinompa na asing, tung so disarihon be boha asa uli jala hot adong partubuna marsundutsundut. Nunga godang jolma holan na manarihon dirina, mangahut tu dirina be na so marnasae, na so marnahabutongan, alai sai marnahurang do. I do umbahen na didok angka na bisuk, sasintongna singkop do na tinompa ni Debata, dorbia manang suansuanan, tu angka na ringkot di parngoluon ni jolma. Alai sai marnahurang do i tu  jala ndang sadia i tu ngolu ni jolma na na matorbanghu hahisaponna dohot angka  na malobihu mongkusna.

Pangalaho sisongon i do na hinalungunhon ni panurirang Jesaya, gabe diparsinta ngolu na marsitumpahan, ngolu na masiondihon di angka na tinompa ni Debata, jolma, angka dorbia dohot nasa suansuanan, na so pola be masisegaan, alai rap masijamotan asa rap mangolu. I do ngolu na imbaru na diparsinta hombar tu harajaon ni Debata:

“Disi ma maringan gompul di lambung ni birubiru,

Jala manggompang babiat di lambung ni hambing,

Jala tampak do anak ni lombu, babiat dohot pinahan napinamokmok,

Jala dakdanak na metmet marmahan nasida.

Rap manjampal ma lombu dohot babiat,

Jala tampak modom angka anakna be,

Jala panganon ni singa duhutduhut songon dorbia.

Jala posoposo marmeammeam di lambung ruang ni ulok dari,

Jala dakdanak nambura sirang susu mangarorohon tanganna tu ruang ni libe.

Ndang  adong hajahaton manjahati

manang mangago nasida di sandok dolok ni habadionHu,

Ai gok parbinotoan di Jahowa tano on sogot,

Songon aek laut mangilungkupi tondoloanna.” (Jes 11: 6-9).

Turpuk on ma bagabaga haluaon marhite na mambagabagahon hamumulak ni angka na tinompa i tu hasomalanna hian andorang so madabu dope jolma i tu bagasan dosa, I ma na di bagasan bangko hadameon – “the realm peace condition”. Laos digombarhon turpuk on do panghirimon tu ngolu sogot, na patuduhon ngolu na masitumpahan, masiramotan, jala masihaholongan angka na tinompa i.

[1] Darwin Lumbantobing, Ngolu ni Huria Na Mangolu – Ngolu ni Huria Batak di tingki ni Ephorus Dr. Ingwer Ludwig Nommensen Marojahan tu Bericht  Huria Batak na nienet sian holangholang ni taon 1881 – 1918, (Pematangsiantar: L-SAPA, 2010), hal 450.

[2] F.H. Sianipar, “Aspek Spiritual Penyakit”  dalam Bungaran Antonius Simanjuntak (ed), Pemikiran Tentang Batak – Setelah 150 Agama Kristen di Sumatera Utara, (Jakarta: Yayasan Pustaka Obor Indonesia, 2011). Hal 93.

[3]     Lihat C.A. van Peursen, Tubuh, Jiwa dan Roh – Sebuah Pengantar dalam Filsafat Manusia, Jakarta: BPK, 1979.

[4]     Harry Parkin, Batak Fruit of Hinduism Thought, Madras: Christian Literature Society, 1978, p. 22.

[5]     Bonaria Hutabarat, Maka Tergeraklah Hatinya oleh Belas Kasihan – 100 Tahun Diakonia Rumah Sakit HKBP Balige (1901 – 2001), Balige: Percetakan Sinarta, 2002, hal 51.

[6]     Bonaria Hutabarat, Maka Tergeraklah Hatinya oleh Belas Kasihan, Balige: 2002, hal 53-54. Marhite hatorangan on, anggo ari hatutubu ni RS HKBP Balige i ma ari 1 Agutus 1918.  Asa ndang taon 1928 – songon na tarsurat di Alamanak HKBP, 2017, na so adong hatorangan na tangkas. Asa dung olat ni on, patotaon ma ari hatutubu ni RS HKBP Balige gabe ari 1 Agustus 1918.